Жогорку Кеңеш Гүлчөгө шаар статусун берүү боюнча мыйзам долбоорун жактырды

Бүгүн, 25-сентябрда Жогорку Кеңештин жыйынында Ош облусунун Алай районундагы Гүлчө айыл аймагын райондук маанидеги шаар категориясына киргизүү жөнүңдө мыйзам долбоору үч окууда каралып, колдоо тапты.

Маалыматка ылайык, айыл аймактын курамында 12 айыл бар. Калкынын саны 22 566 адамды түзөт.

Ал жакта Алай райондук мамлекеттик администрациясы, Гүлчө айыл өкмөтү, УКМКнын райондук бөлүмчөсү, аскер бөлүгү, прокуратура, сот, Социалдык фонд жана башка министрликтердин, мекемелердин райондук бөлүмдөрү, банктар жана стадиондор жайгашкан.

Айылда 1 кесиптик лицей, 3 орто мектеп, 1 мектеп-интернат, 5 бала бакча бар. 90 пайызы таза суу менен камсыз болгон, жолдорунун 63 пайызына асфальт төшөлгөн.

Эми мыйзам долбоорун президент Садыр Жапаров карайт.

Эске салсак, 12-сентябрда президент Садыр Жапаров Алымбек датканын урматына арналган майрамдык иш-чарада Гүлчө айылына шаар статусун берүү маселесин кароону тиешелүү мамлекеттик мекемелерге тапшырганын айткан.