Грек-рим күрөшүндөгү реформа. Уран Жузуп уулу кызматтан кетүү себебин айтты

Кыргызстандын улуттук грек-рим күрөшү боюнча курама командасынын башкы машыктыруучусу Уран Жузуп уулу өзүнүн кызматтан кеткендиги боюнча комментарий берди.

Ал Инстаграм баракчасы аркылуу кайрылуу жасап, чечим үй-бүлөлүк шарттарга байланыштуу кабыл алынганын белгиледи. Ошондой эле ал кызматта аз убакыт иштесе да, жардам берген машыктыруучуларга, федерацияга жана аны колдогон жетекчилерге терең ыраазычылык билдирди.

Машыктыруучу Хорватияда өткөн дүйнөлүк чемпиондукта бардык спортчулар жан дили менен күрөшкөнүн белгилеп, бирок күткөн жыйынтык чыкпаганын айтты. Ошол эле учурда жаш команданын келечегине ишенимин билдирип, спортчуларга ийгиликтерди каалады.

Белгилей кетсек, 13-сентябрдан 21-сентябрга чейин Хорватиянын Загреб шаарында күрөш боюнча дүйнөлүк чемпиондук орун алып, ал жакка грек-рим күрөшү боюнча барган 10 балбандын бирөө гана коло медаль менен кайтты. Аны балбан Асан Жанышов алып келди.

Мындан улам бүгүн, 25-сентябрда кураманын жалпы машыктыруучу тобу кеткендиги жарыяланды.