Даниядагы бир нече аэропорт дрондордон улам жабылды

Даниянын Ольборг аэропортунун жанынан дрондордун көрүнүшү өлкөнүн аба мейкиндигин убактылуу жабууга алып келди. Бул тууралуу даниялык басылмалар жазышты.

Маалыматтарга караганда, полиция Эсбьерг, Сондерборг жана Скрыдструп шаарларындагы аэропорттордун жанында да дрондор учуп жүргөнүн кабарлады.

Евробиримдиктин аба коопсуздугу боюнча агенттиги Ольборг аэропортунда таңга чейин учуулар токтотуларын билдирди.

"Бул кокустук эмес, системдүү болуп көрүнүп турат",- деди Даниянын коргоо министри Троэлс Лунд Поулсен.

Премьер-министр Метте Фредериксен бул окуяны өлкөнүн маанилүү инфраструктурасына жасалган эң олуттуу чабуул деп баалады.

Эске салсак, буга чейин Копенгаген жана Осло аэропорттору да дрондордон улам убактылуу жабылган. Акыркы күндөрү Европанын бир катар ири аэропортторунда киберчабуулдар жана дрондордон улам каттамдар үзгүлтүккө учурап, операцияларда олуттуу кечигүүлөр болуп жатат.