Өкмөт башчы МИК куруп жаткан турак жай комплексин жеринен көрүп чыкты

Бүгүн, 25-сентябрда министрлер кабинетинин төрагасы Адылбек Касымалиев Бишкек шаарында Мамлекеттик ипотекалык компания тарабынан курулуп жаткан “Ынтымак” турак жай комплексинен кабар алды. Бул тууралуу өкмөттүн маалымат кызматы кабарлады.

Касымалиевге президенттин иш башкаруучусу Каныбек Туманбаев курулуш иштеринин жүрүшү тууралуу маалымат берди. Белгилүү болгондой, “Менин үйүм” мамлекеттик турак жай программасынын алкагында ишке ашырылып жаткан бул “Ынтымак” турак жай комплексинде 18 жана 24 кабаттан турган 48 көп кабаттуу үй курулмакчы. Андагы 6970 батирдин жалпы аянты 603 миң 534 чарчы метр. Ал эми унаа токтотуучу жайлардын саны 3852 болсо, коммерциялык жайлардын аянты 32 миң 606 чарчы метрди түзөрү айтылды. Курулуш иштери төрт этап менен ишке ашмакчы.

Адылбек Касымалиев көп кабаттуу үйлөрдү куруу иштери өлкөнүн бардык аймактарында ишке ашырылып жатканын, калк жыш жайгашкан жайларда, ири шаарларда жана райондордо жүргүзүлүп жатканын билдирген. Ал ошондой эле мындай иштер үй алууга кезекке турган жарандардын суроо-талаптарын канааттандыруу максатында жүргүзүлүп жатканын айтып, курулуш иштерин сапаттуу жана өз мөөнөтүндө бүткөрүүнү тапшырган.

"Учурда мамлекеттик турак жай программасын ишке ашыруунун алкагында жарандарды жеткиликтүү турак жай менен камсыз кылуу максатында 925 даана көп кабаттуу үй курулууда, андагы батирлердин жалпы аянты 4 миллион чарчы метр", - деп айтылат маалыматта.