Франциянын мурдагы президенти Николя Саркози 5 жылга абакка кесилди

Франциянын мурдагы президенти Николя Саркози "ливиялык иши" боюнча кылмыштуу топко катышканы үчүн күнөөлүү деп табылды. Бул тууралуу чет элдик басылмалар жазышты.

Сот 70 жаштагы саясатчыны беш жылга эркинен ажыратты, бирок жаза мөөнөтүнүн бир бөлүгү шарттуу түрдө берилди. Бул Саркози залдан камалган жок дегенди билдирет, бирок ал бир айдын ичинде прокуратурага барып, жаза мөөнөтүнүн качан башталарын тактап бериши керек. Ошондой эле сот аны 100 миң евро айып пул төлөөгө милдеттендирди.

Саркози айыптоолордун төрттөн бирөөсү боюнча, тактап айтканда, кылмыштуу уюмга катышкандыгы боюнча гана күнөөлүү деп табылды. Калган үч айып боюнча (шайлоо кампаниясын мыйзамсыз каржылоо жана коррупция) сот тарабынан четке кагылды. Сот саясатчынын аракеттери жарандардын бийлик өкүлдөрүнө болгон ишенимине доо кетириши мүмкүн экенин белгиледи.

Тергөөчүлөрдүн маалыматына ылайык, Саркозинин шайлоо штабы Ливиянын ошол кездеги лидери Муаммар Каддафиден болжол менен 50 миллион евро алган. Бул чет өлкөлүк каржылоого тыюу салган мыйзамды бузган. Анын ордуна Париж Каддафини эл аралык коомчулукта актап чыгууга көмөктөшмөк. Бирок Саркози дооматтарды четке кагып, бул ишти саясий мүнөздө деп атап, апелляция берерин билдирди.

Бул - 2007–2012-жылдары Францияны башкарган мурдагы президентке каршы үчүнчү ирет козголгон сот иши. Буга чейин ал коррупция жана соода боюнча да күнөөлүү деп табылып, дагы бир иште шарттуу жаза алган.