Испания Газага гуманитардык жардам үчүн аскер кемесин жөнөттү

Испаниянын Аскер-деңиз флотуна таандык Furor аттуу деңиз операциялык кемеси Газа секторуна жөнөдү. Ал Картахена портунан чыгып, Жер Ортолук деңизиндеги "Глобалдык туруктуулук флоту" жайгашкан аймакка багыт алды. Бул тууралуу чет өлкөлүк басылмалар жазышты.

Испания өкмөтү бул кеме флотко кошулбай турганын, болгону гуманитардык жардам же куткаруу кырдаалдарында гана ишке киришерин билдирди.

Маалыматка ылайык, Furor – океандык күзөт милдетин аткарууга ылайыкташкан, медициналык мүмкүнчүлүгү бар деңиз операциялык кемеси. Анда 46 аскер кызматкери жана 4 дарыгер бар.

Белгилей кетсек, Испаниянын премьер-министри Педро Санчес кечээ Нью-Йоркто сүйлөп жатып, жарандардын Жер Ортолук деңизинде коопсуз жүрүү укугу сакталууга тийиш экенин белгилеп, флотко жардам берүү же куткаруу операциясын жүргүзүүгө керектүү бардык жабдуулар менен камсыздалган деңиз операциялык кемеси жолго чыгарын айткан.