Трамп Израилдин Батыш Жээкти аннексиялоо планына каршы чыкты

АКШ президенти Дональд Трамп Израилдин Иордан дарыясынын Батыш жээгиндеги палестин аймактарын аннексиялоо мүмкүнчүлүгүнө каршы чыкты. Ал 25-сентябрда Ак үйдө өткөн маалымат жыйынында "Израилге мындай кадамга барууга жол бербейм" деп билдирди.

Трамп ошондой эле Газа тилкесинде ок атышууну токтотуу жана узак мөөнөттүү тынчтык келишимине жетишүүгө үмүт артканын билдирди.

"Биз Газа боюнча келишимге, балким, тынчтыкка да абдан жакындап калдык",– деди ал.

Учурда Израил Батыш жээктеги еврей конуштарын кеңейтүүнү улантууда, айрым министрлер толук аннексияны да колдоодо. Эл аралык коомчулук бул аймактарды оккупацияланган деп тааныса да, Израил өз саясатын өзгөртпөй жатат.

Нетаньяхунун бүгүн, 26-сентябрда БУУ Башкы ассамблеясында сүйлөшү жана 29-сентябрда АКШ президенти менен жолугушуусу күтүлүүдө. Палестинаны мамлекет катары тааныган Батыш өлкөлөрүнө каршы Израилдин позициясы ушул иш-чараларда да көтөрүлөрү болжолдонууда.