Аялдар конгресси менен "Росатом" аялдар коомчулугу кызматташтык боюнча Жол картасына кол коюшту

Москва шаарында өтүп жаткан Дүйнөлүк атом жумалыгынын алкагында Кыргыз Республикасынын Аялдар конгресси менен "Росатомдун" аялдар коомчулугунун ортосунда кызматташтык боюнча Жол картасына кол коюлду.

"Бүгүн биз өз ара түшүнүшүү боюнча меморандумду ишке ашырууга багытталган так иш-чараларды камтыган Жол картасына кол койдок. Эң маанилүү милдет – Кыргызстандагы аялдар менен жаш кыздарды мүмкүн болушунча көбүрөөк жогорку технологиялык илимдерге тартуу. Анткени илимди өнүктүргөн жана алдыңкы технологияларга ээ болгон өлкөнүн келечеги бар",- деп белгиледи Кыргызстан Аялдар конгрессинин президенти Замира Акбагышева.

Тараптар ошондой эле биргелешкен долбоорлорду, билим берүү демилгелерин жана тажрыйба алмашуу үчүн аянтчаларды түзүүнү макулдашты.

"Росатом" аялдар коомчулугунун жетекчиси Александра Рябых демилгенин эл аралык масштабын баса белгиледи. "Биздин коомчулук 40тан ашык өлкөдө долбоорлорду ишке ашырууда. Октябрь айында Аялдар конгресси менен биргеликте "Россия жана Кыргызстандын аялдарынын диалогу“ аттуу алгачкы форум өткөрүлөт. Ал форум илим тармагындагы аялдарды гана эмес, башка чөйрөлөрдүн өкүлдөрүн да бириктирет. Биз өнөктөштүккө ачыкпыз",- деди ал.

Мындан тышкары, Кыргызстандын Аялдар конгресси Баласагын атындагы университеттин базасында студент кыздар жана окутуучу аялдар үчүн борбор түзүп, аларды илимий-техникалык прогресстин маселелерине кеңири тартуу мүмкүнчүлүгүн камсыз кылды.