Нетаньяху өзүнүн учагынан Йеменди бомбалоого буйрук берген

Израилдин премьер-министри Биньямин Нетаньяху АКШга бараткан учактан Санадагы хуситтердин аскердик буталарына абадан сокку урууга буйрук берген. Бул тууралуу өкмөт башчынын кеңсеси билдирди.

"Нетаньяху Нью-Йоркко бараткан учактан Йеменге сокку урууга буйрук берди, андан кийин ал Коргоо министринен, Башкы штабдын башчысынан жана анын аскер катчысынан үзгүлтүксүз маалымат алды",- деп айтылат анда.

Кеңсе соккулар Санадагы хуситтердин штабдарын жана курал кампаларын бутага алганын белгиледи.

Айта кетсек, Нетаньяху кечээ, 25-сентябрда АКШга учуп кеткен. Ал бүгүн БУУнун Башкы ассамблеясында сөз сүйлөмөкчү.

25-сентябрда Израилдин коргоо министри Исраэль Кац Израилдин аба күчтөрү Йемендин баш калаасында хуситтердин бир нече буталарына, анын ичинде бир нече аскерий лагерлерге абадан сокку урулганын билдирген.

Чет элдик басылмалар Израил соккусунан улам Санада кеминде 9 адам каза болуп, 174 адам жаракат алганын жазып чыгышты.