Израилдин өкмөт башчысы БУУнун трибунасында дүйнөлүк лидерлерди сынга алды

Израилдин премьер-министри Биньямин Нетаньяху БУУнун Башкы ассамблеясында сүйлөгөн сөзүндө Палестина мамлекетин тааныган өлкөлөрдүн лидерлерин сынга алды.

"Сиздердин уятсыз чечимиңиздер дүйнө жүзү боюнча еврейлерге жана бейкүнөө адамдарга каршы терроризмди күчөтөт. Бул баарыңар үчүн уят иш", - деп келтирет анын сөздөрүн чет элдик басылмалар.

Нетаньяху Палестина мамлекетине каршы чыгуу жеке өзүнүн же өкмөтүнүн саясаты эместигин, а Израил мамлекетинин жана элинин саясаты экенин белгилеген.

Израилдин премьер-министри трибунага чыкканда көптөгөн өлкөлөрдүн делегациялары залдан чыгып кетишкен. Ошентип ал жарымы бош калган залда сүйлөдү.

Айта кетсек, БУУнун Нью-Йорктогу штаб-квартирасында өткөн конференцияда Андорра, Бельгия, Люксембург, Мальта, Сан-Марино жана Франция Палестина мамлекетин тааныганын жарыялашкан. Андан тышкары, 21-сентябрда Австралия, Улуу Британия, Канада жана Португалия Палестинаны расмий таанышкан.