Трамп Газа боюнча "өзгөчө" келишимди даярдап жатат

АКШ президенти Дональд Трамп Axios басылмасына берген маегинде Газа тилкесинде согушту токтотуу боюнча сүйлөшүүлөр "акыркы баскычка" жеткенин билдирди. Анын айтымында, келишим Жакынкы Чыгышта кеңири тынчтык орнотууга өбөлгө түзөт. Трамп араб өлкөлөрү менен сүйлөшүүлөр жемиштүү жүрүп жатканын, ХАМАС да процесске тартыларын айтты.

Маалыматка караганда, келишимдин негизги пункттарына ок атышууну токтотуу, 48 саат ичинде барымтадагы адамдарды бошотуу, израилдик аскерлерди Газанын аймагынан акырындык менен чыгаруу, ХАМАСсыз башкаруу механизмин түзүү жана анклавды калыбына келтирүү үчүн мусулман өлкөлөрүнүн каржылоосу кирет. Ошондой эле ХАМАСты куралсыздандыруу жана Газаны демилитаризациялоо каралган.

Учурда АКШ менен Израилдин ортосунда эки негизги пикир келишпестик бар: ХАМАСты куралсыздандыруунун шарттары жана Газага Палестина администрациясынын кандай деңгээлде катышары. Израил премьер-министри Биньямин Нетаньяху Палестина администрациясынын ролуна каршы экенин билдирген.