Кош бойлуу аялдарды төрөт үйүнө жеткирген жол тескөөчүлөр сыйланышты

ИИМдин Жол кыймылынын коопсуздугун камсыздоо башкы башкармалыгынын башчысы Жеңишбек Жоробеков өз милдетин жоопкерчилик менен аткарган жана жарандардын ыраазычылыгына арзыган кызматкерлерди сыйлады.

Башкармалыктан билдиришкендей, Жоробеков жол кыймылынын коопсуздугун камсыздоодо ырааттуу жана өзгөчө кырдаалдарда ыкчам аракеттерди көрсөткөн кызматкерлердин эмгегин жогору баалады.

Айрыкча, Бишкек шаардык кайгуул кызматкерлери кош бойлуу аялдарды өз убагында төрөт үйлөрүнө жеткирип, жаш балдардын аман-эсен жарык дүйнөгө келишине көмөктөшкөн учурлар өзгөчө белгиленди.

"Бул аракеттер – чыныгы кызматтык эрдиктин үлгүсү. Мындай үлгүлүү иш-аракеттер башка кызматкерлер үчүн да өрнөк болушу керек",- деди Жоробеков.

ИИМ кызматкерлердин мындай көрүнүктүү ишин коомчулукка жайылтууну, ошондой эле алардын коом алдындагы кызматына тийиштүү баа берүүнү уланта турганын кошумчалады.