Ошто мугалимдер күнү салтанаттуу белгиленди

Бүгүн, 2-октябрда эл аралык Кыргыз-Өзбек университетинин жыйындар залында мугалимдердин кесиптик майрамына арналган “Мугалим — коомдун сыймыгы жана күзгүсү” аттуу салтанаттуу иш-чара болуп өттү. Бул тууралуу облустук өкүлчүлүктөн билдиришти.

Иш-чарага президенттин Ош облусундагы ыйгарым укуктуу өкүлүнүн орун басары Талантбек Арстанкулов, окуу жайдын жетекчилиги, облустагы мектеп директорлору, “Жылдын мыкты мугалими” жана “Жылдын мыкты тарбиячысы” республикалык сынактарынын жеңүүчүлөрү, ошондой эле жалпы агартуучулар катышты.

Өкүлдүн орун басары облус жетекчисинин атынан сөз сүйлөп, билим берүү тармагында эмгектенип келе жаткан мугалимдерди кесиптик майрамы менен куттуктады. Ал эми республикалык сынактардын жеңүүчүлөрүнө өкүлчүлүктүн атынан ноутбуктар тапшырылып, мыкты мугалимдер Ардак грамоталар менен сыйланды.

Салтанаттуу жыйында маданият кызматкерлеринин концерттик программасы менен коштолуп, катышуучуларга майрамдык маанай тартууланды.