Казакстанда жасалма интеллект лабораториясы ачылат

Астанада жасалма интеллект лабораториясы ачылат. Анын алгачкы долбоору Telegram менен Казакстандын суперкомпьютердик кластеринин коллаборациясы болот. Бул тууралуу Telegram тиркемесинин негиздөөчүсү Павел Дуров билдиргенин чет элдик басылмалар жазышты.

"Мен бүгүн дал ушул имаратта, Астанадагы эл аралык жасалма интеллект борборунун имаратында жасалма интеллект лабораториясынын ачылышын жарыялап жатканыма абдан сыймыктанам",- деди Дуров Digital Bridge форумунун пленардык сессиясында сүйлөп жатып.

Анын айтымында, акыркы айларда Telegram блокчейн менен жасалма интеллекттин айкалышкан жаңы технологиясын иштеп чыккан. Бул инновация дүйнө боюнча 1 миллиарддан ашык адамга децентралдашкан компьютердик систем аркылуу жеке тартипте ЖИ функцияларын колдонууга мүмкүнчүлүк берет.

Дуров белгилегендей, жаңы долбоорду Казакстандын Жасалма интеллект жана санариптик өнүктүрүү министрлиги ишке киргизет.