Ташиев алдыдагы шайлоодо бийлик мурункулардын катасын кайталабастыгын айтты

УКМКнын төрагасы Камчыбек Ташиев алдыдагы парламенттин шайлоодо азыр бийлик мурунку бийликтин каталарын кайталастыгын айтты. Ал Саясат.kg порталына берген маегинде бийлик башындагылар тарабынан айрым талапкерлерге бата берилип жатат деген кептерди төгүндөдү.

"Мурунку бийликтер жасаган катаны биз кайталабайбыз. Ооба, бата берип жүрүшкөн. Мына ошол бата берген журт башчылары азыр кайда? Бизде орун алган бийлик алмашуулар, революциялар дал ушунун айынан чыкпады беле! Көндүм адаттын калышы кыйын, мен да айрым депутат болгусу келгендердин бизге жол издеп, жолугуп, бата алууга умтулуп жүрүшкөнүн билем. Жада калса, жакын адамдарыбыздын арасында да андайлар бар. Буга окшогондорго ажобуздун да, менин да убактыбыз жок. Өзүбүздүн жумуш чачтан көп, уйкубуз аз.

Ачыгын айтканда, биз таза шайлоо өткөрүү ниетинде абдан чоң жумуш жасадык, болушунча адам факторун азайттык. Шайлоочулардын кызыкчылыгы биринчи орунда болду. Эгерде биз өз адамдарыбызды алып келүүнү көздөсөк, анда ушунун баарын жасаштын эмне кереги бар эле? Эски шайлоо системин калтырып, жыргап жата бербейт белек",- деди атайын кызматтын башчысы.