Айтматов проспектисинде жөө адамдар үчүн жер алдынан өтүүчү өтмөк курулат

Бишкектеги Айтматов проспектине жөө адамдар үчүн жер алдынан өтүүчү өтмөк курулат. Бул тууралуу мамлекеттик телеканалдардын биринде маалымдалды.

Айтматов проспектисиндеги жол ар биринин туурасы 4 метрден болгон алты тилкеге чейин кеңейтилген.

Муну менен катар жөө жана веложүргүнчүлөр үчүн эки тарабында тең кең тротуарлар жана веложолдор курулган.

Эске салсак, бүгүн, 3-октябрда Бишкектин Айтматов проспектисинде Мерседес-Бенц үлгүсүндөгү унаанын айдоочусу жолдо өтүп бара жаткан жүргүнчүнү сүзүп кеткени айтылган.

Буга чейин тургундар Айтматов проспектисинде мамлекеттик резиденциядан тартып Масалиев проспектисине чейинки аралыкта жөө өтмөктөр да, светофорлор да жок экенин, ошондуктан жолду өз алдынча кесип өтүүгө мажбур болуп жатышканын айтышкан.