Акчаны дааратканага ыргытып... Ошто милициянын подполковниги жана майору кармалды

Милиция кызматкерлери 300 миң сом пара алып жаткан жеринен кармалышты. Бул тууралуу Улуттук коопсуздук мамлекеттик комитети билдирди.

Маалыматка ылайык, Араван РИИБинин коомдук коопсуздук кызматынын уруксат берүү системинин инспектору, милициянын подполковниги М.Ж. жана Ноокат райондук ички иштер башкармалыгынын тергөө кызматынын тергөөчүсү, милициянын майору С.А. тергөөгө чейинки текшерүү иштерин оң жакка чечип берүү үчүн жарандан аталган сумманы талап кылган.

Кармалган учурда шектүүлөрдүн бири каршылык көрсөтүп, акчаны жок кылууга аракет кылып, анын бир бөлүгүн дааратканага ыргытып жиберген. Алар УКМКнын убактылуу кармоочу жайына киргизилишти.

Атайын кызмат учурда бул кылмышка тиешеси болушу мүмкүн болгон башка адамдарды аныктоо иштери жүргүзүлүп жатканын кошумчалады.