Мас абалында жол кырсыгына кабылган милиция кызматкерлери иштен бошотулду

Социалдык тармактарда ички иштер органдарынын эки кызматкеринин катышуусундагы жол кырсыгынын видеосу тарагандан кийин Ички иштер министрлиги тарабынан кызматтык иликтөө жүргүзүлдү.

Министрликтин басма сөз кызматы билдиргендей, текшерүүнүн жүрүшүндө окуя болгон учурда аталган кызматкерлер мас абалында болгону аныкталды. Бул факт кызматтык тартиптин жана мыйзамдардын талаптарын одоно бузулушу катары бааланды.

Кызматтык иликтөөнүн жыйынтыгында милициянын капитандары С.У. жана М.У. ички иштер органдарынан бошотулду.

Министрлик кызматтык тартипти жана мыйзам талаптарын бузган кызматкерлерге карата ээлеген кызматына жана иш тажрыйбасына карабастан катуу тартиптик чаралар көрүлөрүн, анын ичинде кызматтан бошотууга чейин чаралар колдонуларын билдирди.