Токаев Казакстан Украина боюнча сүйлөшүүлөр үчүн аянтча берүүгө даяр экенин билдирди

Казакстандын президенти Касым-Жомарт Токаев америкалык кесиптеши Дональд Трамп менен телефон аркылуу сүйлөшүүдө украин жаңжалын чечүүнүн татаалдыгын баса белгилеп, тараптарга сүйлөшүү аянтчасын берүүгө даяр экенин билдирди. Бул тууралуу Казак лидеринин басма сөз кызматы кабарлады.

"Биздин мамлекет башчы аймактык маселе үстөмдүк кылуучу позицияны ээлеген жана жер-жерлерде реалдуу кырдаалды эске алуу менен эки тараптан тең компромисстерди талап кылган украин жаңжалын чечүүнүн татаалдыгын баса белгиледи",- деп айтылат маалыматта.

Токаев Казакстан бардык кызыкдар тараптарды сабырдуулукка, ийкемдүүлүккө жана кесипкөйлүккө үндөп, тынчтык формуласын издөөнү улантууга чакырарын белгилеген.

"Касым-Жомарт Токаев АКШ президентинин бир катар эл аралык аскердик кагылышууларды токтотууга жана АКШнын ички потенциалын чыңдоодо оң натыйжаларга жетишүүгө мүмкүндүк берген мыкты лидерлик сапаттарын белгиледи",- деп кошумчаланат билдирүүдө.

Басма сөз кызматы Токаевдин кечээ, 23-декабрда Трамп менен болгон телефондук сүйлөшүүсү узакка созулганын белгилеп, алар эки тараптуу күн тартиби жана учурдагы эл аралык кырдаал боюнча пикир алышканын маалымдайт.