Бишкек мэриясы корпоративдик кечеге пландалган каражатты майыптыгы бар балдарга жумшады

Бишкек шаарынын мэриясынын аппарат кызматкерлеринин демилгеси менен мурда корпоративдик иш-чара өткөрүүгө пландалган профсоюз комитетинин каражаттары майыптыгы бар балдарга социалдык колдоо көрсөтүүгө багытталды.

Мэриянын маалыматына ылайык, шаар мэри Айбек Жунушалиев №30 атайын мектепке барды. Шаар башчысы мектептин тарбиялануучуларына балдардын физикалык жөндөмдөрүн өнүктүрүүгө жана ден соолугун чыңдоого арналган спорттук машыгуу жабдууларын тапшырды.

Мэр окуучуларды жана педагогикалык жамаатты келе жаткан Жаңы жылы менен куттуктап, балдарды Бишкек шаарынын мэринин жаңы жылдык балатысына чакырды.

Мындан тышкары, мектептин медициналык кабинетин жакшыртуу үчүн Бишкек мэриясынын резервдик фондунан каражат бөлүү чечими кабыл алынды.

Белгилей кетсек, майыптыгы бар балдар үчүн №30 атайын мектеп 1938-жылдан бери иштеп келет. Учурда бул билим берүү мекемесинде 288 окуучу билим алууда.