Садыр Жапаров бизнеске көптөгөн жеңилдиктер бериле турганын айтты

Өлкөдө келерки жылдан тарта ишкерликке көптөгөн жеңилдиктер берилет. Бул тууралуу президент Садыр Жапаров 25-декабрда өтүп жаткан төртүнчү Элдик курултайда айтты.

Айтымында, мамлекет ишкерлик үчүн ыңгайлуу шарттарды түзүүнү улантып, ишкерлерди колдойт.

"Айрым ишкерлер ашыкча текшерүүлөргө, айрым учурда адилетсиздикке кабылган учурлар бар. Алардан кабарым бар. Жыңы жылдан кийин күч түзүмдөрүн, Салык кызматын, бизнес чөйрөсүн чогултуп, тийиштүү чечимдерди кабыл алуу планым бар. Бизнеске көптөгөн жеңилдиктерди беребиз",- деди өлкө башчысы.

Ошондой эле мамлекет башчысы курултайда акыркы жылдардагы өлкөнүн өнүгүүсү, ишке ашкан ири долбоорлор, экономикалык өсүштөр, жасалып жаткан ар кыл тармактагы реформалар тууралуу айтты.

Белгилей кетсек, бүгүн, 25-декабрда Бишкекте IV Элдик курултайдын биринчи жыйыны өтүп жатат. Ага 7 дубандан, Бишкек жана Ош шаарларынан жалпы 690 делегат катышууда.