11 айдын ичинде ишеним телефонуна 67 429 чалуу келип түшкөн

2025-жылдын 11 айында "Балдар үчүн ишеним телефону – 111" мекемесине жалпы 67 миң 429 чалуу түшкөн. Бул тууралуу 26-декабрда Эмгек, социалдык камсыздоо жана миграция министрлиги билдирди.

Берилген маалыматка ылайык, чалуулардын ичинен 2777 жаран консультация же жардам алуу үчүн кайрылган. Алардын 1170и (42,1 пайызы) - балдар, 1607си (57,9 пайызы) - чоңдор. Жалпысынан 1977 абонентке консультация берилген. Чалуулардын ичнен 574 жаран психологиялык жардам алган, ал эми 226 жаран учурда тиешелүү мамлекеттик органдарга чара көрүү үчүн өткөрүп берилген.

Жынысы жана жаш курагы боюнча бөлүштүрүүдө эркектер - 438 (15,8 пайызы), аялдар - 1169 (42 пайызы), балдар (уулдар) - 324 (11,7 пайызы), кыздар - 846 (30,5 пайыз) экени аныкталган.

Белгилей кетсек, "Балдар үчүн ишеним телефону – 111" мекемеси 2015-жылдан бери иштеп келет. Ал суткасына 24 саат бою үзгүлтүксүз иштеп, республиканын бардык аймактарынан түшкөн чалууларды акысыз кабыл алат. Борбордун психологдору күнү-түнү нөөмөттө туруп, кайрылган жарандарга консултациялык жана психологиялык жардам көрсөтүшөт.