Калифорнияда катуу бороон суу ташкынына себеп болду

АКШнын Калифорния штатында Рождество майрамы алдында катуу бороон болуп, нөшөрлөгөн жамгыр суу ташкынына алып келди. Бул тууралуу чет элдик басылмалар жазышууда.

Маалыматка ылайык, Түштүк Калифорниянын айрым аймактарында суу каптоо жана жер көчкү катталып, жүздөгөн тургундар үйлөрүн таштап кетүүгө мажбур болушкан. Тоолуу райондордо баткак жана таштандылар турак жайларга кирген.

АКШнын Улуттук аба ырайы кызматы бул сейрек кездешүүчү “атмосфералык дарыя” кубулушу менен байланыштуу экенин билдирип, аба ырайы өмүргө кооптуу бойдон кала берерин эскертти.

Калифорниянын губернатору Гэвин Ньюсом алты округда өзгөчө кырдаал режимин жарыялады. Синоптиктердин божомолунда, катуу жаан-чачын Рождество майрамы учурунда да улануусу мүмкүн.

Алдын ала маалымат боюнча, бороондон улам кеминде эки адам каза болду. Өзгөчө кырдаал кызматтары коопсуздук чараларын күчөтүп жатышат.