Октябрь райондук соту активист Айталиевге үч жыл пробациялык жазаны жарыялады

Бишкек шаарынын Октябрь райондук соту кечээ, 25-декабрда активист Бекназар Айталиев боюнча чечим чыгарды. Укук коргоочу Гүлшайыр Абдирасулованын маалыматы боюнча, ал массалык башаламандыктарга чакыруулар боюнча күнөөлүү деп табылып, төрт жылга эркиндигинен ажыратуу жазасы пробациялык үч жылга алмаштырылды.

Эскерте кетсек, Айталиев 7-августта Көк-Жар конушундагы №172 контурдагы абал боюнча маалымат жыйын өткөргөн. Ал жергиликтүү тургундардын атынан президент Садыр Жапаровго жана УКМКнын башчысы Камчыбек Ташиевге үйлөрдүн бузулушун токтотууну суранган. Андан соң ал кармалган.

Соттун маалыматы боюнча, ага Кылмыш-жаза кодексинин 278-беренесинин 3-бөлүгү (Бийлик өкүлдөрүнүн мыйзамдуу талаптарына жигердүү баш ийбөөгө жана массалык башаламандыктарга чакырыктар, ошого тете жарандарга зомбулук көрсөтүүгө чакырыктар) боюнча айып коюлган.