УКМКнын Ак-Суу районундагы бөлүмүнүн жаңы имараты пайдаланууга берилди

Бүгүн, 27-декабрда Улуттук коопсуздук мамлекеттик комитетинин Ысык-Көл облусу боюнча башкармалыгынын Ак-Суу районунун бөлүмүнүн жаңы имараты ачылды.

Маалымат борбору билдиргендей, салтанаттуу иш-чарага УКМК төрагасы Камчыбек Ташиев, президенттин Ысык-Көл облусундагы өкүлү Бактыбек Жетигенов, жергиликтүү өз алдынча башкаруу органдарынын жетекчилери, УКМК ардагерлери жана Ысык-Көл облусу боюнча башкармалыгынын кызматкерлери катышты.

Аталган бөлүмдүн жаңы имараты 18 сотых жер тилкесинде жайгашып, имараттын өзүнүн аянты 240 чарчы метрди түзөт. Курулуш иштери жогорку сапатта жүргүзүлүп, заманбап жана экологиялык таза материалдар колдонулган. Куруу иштери 1-июнда башталып, декабрь айында пайдаланууга берилди. Имарат эки кабаттан турат жана заманбап шарттар менен камсыздалган.

Өз кезегинде УКМК төрагасы жаңы имараттын курулушу аскер кызматкерлеринин өз кызматын так аткарууга маанилүү кадам болуп, өлкө коопсуздугун камсыздоого өбөлгө болорун белгиледи.