Ташиев сот кызматкерлери тыкыр көзөмөлдө болушарын айтты

УКМКнын төрагасы Камчыбек Ташиев кечээ, 27-декабрда Ысы-Көлдүн түштүк тарабындагы унаа жолдун курулушу боюнча жыйын өткөрдү.

Анда атайын кызматтын башчысы сот тутумуна да токтолуп, аларды мыйзам чегинде иштөөгө жана адилеттү чечимдерди чыгарууга чакырды. Ал судьялар саясатка аралашпоосу керектигин баса айтты.

"Мыйзамдан чыгып кеткен сот кызматкерлерин тазалоо коопсуздук органынын моюнунда турат. Бизде саясатка аралашып кеткен кээ бир соттор тууралуу маалыматтар бар. Отуруп алышып, кайсы бир адамдар менен саясатты сүйлөшүшөт, чоңдорду талкуулашат, мамлекет жетекчилеринин сөздөрүн талдашат. Жакында аларга чара көрөбүз. Мурдагыдай пара алууну оюңардан чыгарып жибергиле", - деди УКМКнын башчысы.

Ташиев ошондой эле соттордун айлыгына кызыгып, райондук судья 250 миң сом, облустуку 300, Жогорку Соттун кызматкери 500 миң сом алышарын укту.