Жаңы жыл күнү 12 миңден ашык милиция кызматкери коопсуздукту камсыздайт 

Жаңы жыл күнү 12 миңден ашуун милиция кызматкери коопсуздукту камсыз кылат. Бул тууралуу ИИМдин басма сөз кызматы кабарлады.

Маалыматка ылайык, өздүк курамдын кызмат өтөөгө даярдыгын текшерүү максатында Ички иштер министринин биринчи орун басары, орун басарлары өлкөнүн бардык аймактарында гарнизондук саптык кароолорду өткөрүштү. Алар облустарга барып, жеринде кызматтын уюштурулушун жана коюлган тапшырмалардын аткарылышын карап чыгышты.

"Ички иштер органдары жаңы жылдык майрамдардын тынч жана коопсуз өтүшүн камсыз кылуу үчүн бардык зарыл чараларды көрүүдө. Милициянын күчөтүлгөн наряддары жарандар көп чогулган жерлерде, көчөлөрдө жана коомдук жайларда кызмат өтөп, өлкөнүн ар бир тургуну жана коногу майрамды коопсуз шартта тосуп алышына аракет көрүшөт",- деп билдирген министрлик.