Трамп менен Зеленский Орусия менен тынчтыкка жетүүдө олуттуу прогресс бар экенин билдиришти

АКШнын президенти Дональд Трамп жана Украинанын президенти Владимир Зеленский Флорида штатындагы Мар-а-Лаго резиденциясында өткөн үч сааттык сүйлөшүүлөрдөн кийин Орусия менен тынчтыкка жетүү жолунда олуттуу прогресс бар экенин билдиришти. Бул тууралуу чет элдик басылмалар жазышууда.

Дональд Трамп жолугушууну "мыкты" деп атап, тараптар тынчтык келишиминин шарттарынын болжол менен 95 пайызы боюнча макулдашууга жетишкенин айтты. Анын сөзүнө караганда, азырынча чечилбей турган негизги маселе — Донбасс аймактарынын кимге таандык болору.

Владимир Зеленский болсо 20 пункттан турган тынчтык планы 90 пайызга, ал эми АКШ менен Украинанын ортосундагы коопсуздук кепилдиктери толук макулдашылганын билдирди. Анын айтымында, Украина үчүн негизги маселе — аймак эмес, коопсуздук кепилдиктери.

Зеленский тынчтык келишиминин айрым пункттары боюнча референдум өткөрүү мүмкүнчүлүгүн да жокко чыгарган жок. Тараптар жакынкы апталарда европалык өнөктөштөр менен сүйлөшүүлөрдү улантарын билдиришти.