Бишкекте "Тазалыктын" кызматкерлерине жаңы атайын техникалар тапшырылды

Бүгүн, 29-декабрда Токтогул Сатылганов атындагы Кыргыз улуттук филармониясында "Тазалык" муниципалдык ишканасынын кызматкерлери үчүн салтанаттуу майрамдык иш-чара өттү. Бул тууралуу Бишкек шаардык мэриясынын басма сөз кызматынан билдиришти.

Маалыматка ылайык, иш-чарага Бишкек шаарынын мэри Айбек Жунушалиев катышып, кызматкерлерди келе жаткан Жаңы жыл менен куттуктады. Ал "Тазалык" ишканасынын кызматкерлерине ак ниет эмгеги жана борбор калаанын көрктөндүрүлүшүнө кошкон салымы үчүн ыраазычылык билдирди.

Ошондой эле мэр ишкананын директоруна 20 даана жаңы адистештирилген техниканын ачкычтарын тапшырды. Анын айтымында, акыркы эки жылда ишканага жалпысынан 188 даана заманбап техника берилген.

Майрамдык иш-чарага "Тазалык" ишканасынын 1200гө жакын кызматкери катышып, коноктор үчүн концерттик программа уюштурулду. Иш-чаранын алкагында өзгөчөлөнгөн кызматкерлер сыйланышты.