Ысык-Көл жана Нарындагы балдар үйлөрүнүн тарбиялануучулары «Евразия» паркына барышты

Жаңы жылдын алдында Чаектеги «Нур-Булак», ошондой эле Каракол шаарындагы «Ирада» жана «Телегей» балдар үйлөрүнүн тарбиялануучулары «Евразия» паркына барышты. Алар үчүн ал жерде атайын көңүл ачуучу программа уюштурулду.

Ал эми балдарды SOS жаштар кайрымдуулук уюмунун өкүлдөрү коштоп жүрүштү.

Паркта балдар аттракциондорго түшүп, муз аянтчасында ойношту. Ошондой эле Аяз ата менен жолугушуп, интерактивдүү шоуга катышышты. Мындан тышкары аларга «Кышкы жомок» аттуу цирк көрсөтүүсү тартууланып, парктын аймагында сейилдешти.

Белгилей кетсек, мындай сапарлар биринчи жолу уюштурулуп жаткан жок. «Евразия» паркы социалдык колдоо көрсөтүп, тактап айтканда, балдар үйлөрүнүн жана социалдык мекемелердин тарбиялануучуларын үзгүлтүксүз кабыл алып, алар үчүн экскурсияларды жана майрамдык иш-чараларды уюштуруп келет.