Рамзан Кадыров 18 жаштагы уулун мамлекеттик медаль менен сыйлады

Чечен Республикасынын башчысы Рамзан Кадыров өзүнүн 18 жаштагы уулу, аймактын Коопсуздук кеңешинин катчысы Адам Кадыровго "Чечен Республикасынын биринчи президенти Ахмат Кадыровдун элесине" арналган медалды тапшырды. Бул тууралуу орус басылмалары жазышты.

Басылмаларда сыйлык Адам Кадыровго мекендин коопсуздугун, туруктуулугун жана өнүгүшүн камсыздоого кошкон олуттуу салымы үчүн берилгендиги айтылат. Жарыяланган сүрөттөрдө Рамзан Кадыров медалды уулунун көкүрөгүнө өзү тагып жатканын көрүүгө болот. Сыйлоо аземинин так датасы айтылган эмес.

Белгилей кетсек, 23-декабрда аталган медаль Рамзан Кадыровдун улуу баласы Ахматка да тапшырылган. Ал учурда Чечен Республикасынын дене тарбия жана спорт министри болуп иштейт. Ал эми 2024-жылдын ноябрында бул сыйлыкка аймак башчысынын кызы Айшат Кадырова да татыган.

Учурда 18 жаштагы Адам Кадыров бир катар жогорку мамлекеттик сыйлыктардын ээси болуп саналат. Алардын катарында Кадыров ордени, Чечен Республикасынын Баатырынын медалы, Карачай-Черкесия жана Кабардино-Балкария алдындагы эмгеги үчүн ордендер, Татарстан Республикасынын Дуслык ордени жана башка сыйлыктар бар. Ошондой эле ал Грозный шаарынын ардактуу жараны макамын алган.