Беш миң медкызматкерге кезексиз ипотекалык батир берилет

Кыргызстанда беш миң медициналык кызматкер кезексиз ипотекалык батирлерге ээ болот. Бул тууралуу саламаттык сактоо министри Каныбек Досмамбетов өлкөнүн балдар медициналык мекемелерине болгон иш сапарынын жүрүшүндө билдирди.

Министрдин айтымында, бул чечим медицина кызматкерлерин колдоо жана алардын социалдык шарттарын жакшыртуу максатында кабыл алынган. Ипотекалык турак жай менен камсыз кылуу саламаттык сактоо тармагындагы кадрларды сактап калууга жана мотивациялоого багытталган.

"Бул орчундуу маселе болчу, аны президентибиз колдоп берди. Натыйжада ипотекалык турак жайлардан медицина кызматкерлерине 5 миң батир кезексиз берилмей болду. Бул - башталышы гана. Биз жаңы команда менен келдик, реформаларды баштадык. Алдыбызга көптөгөн бийик максаттарды коюп жатабыз жана сиздердин колдооңуздар менен аларга жетебиз деп ишенем",- деди саламаттык сактоо министри.