SUPER.KG’нин жаңы жылдык салты: Балдарга кубаныч, жүрөккө ой салган көз ирмемдер

SUPER.KG медиа порталы жыл сайын Жаңы жыл майрамын жакшылык менен тосууну салтка айланткан. Бул жолу да салт улантылып, редакция жамааты балдардын жүзүнө жылмаюу тартуулоо максатында балдар үйүнө барды.

Жаңы жылдык кербендин башында Аяз ата — Биржан Байбол, ал эми Аяз кыз — Аида Багышбекова болду. Демөөрчүлөрдүн колдоосу менен балдарга керектүү белектер алынып, майрамдык маанай жаралды. Балдардын шаң-күлкүсү, кубанычка толгон көз караштары бул сапардын негизги сыйлыгы болду.

Бирок бул чыгарылыш жөн гана майрамдык шаң менен чектелбейт. Кадрлардан балдардын кубанычы менен катар, алардын ичиндеги кусалыкты, сагынууну, айта албаган сырларын да байкоого болот. Айрым көздөрдө үмүт оту жанса, айрымдарында ата-энеге болгон сагыныч жашынып турат.

SUPER.KG’нин бул кайрымдуулук чыгарылышы көрүүчүнү ойго салат, жүрөккө жетет жана Жаңы жылда бирөөгө кубаныч тартуулоонун канчалык маанилүү экенин эске салат. Анткени кээде кичинекей белек же жылуу сөз бир баланын бүтүндөй күнүн жарык кылышы мүмкүн.