"Тазалык" кызматкерлеринин каза болушу: Үчүнчү адамдын сөөгү табылды

Өзгөчө кырдаалдар министрлигинин маалыматына ылайык, үч эркек адамды издөө боюнча жүргүзүлгөн куткаруу иштери толугу менен жыйынтыкталды. Иш-чаралар 2025-жылдын 30-декабрында министр Бообек Ажикеевдин тапшырмасы менен башталган.

Куткаруучулардын ыкчам жана координацияланган аракеттеринин натыйжасында изделип жаткан адамдардын бардыгы табылды. Тактап айтканда, 30-декабрь күнү каналдан биринчи адамдын сөөгү аныкталып, ал ички иштер органдарынын кызматкерлерине өткөрүлүп берилген. Эртеси, 31-декабрда саат 09:50 чамасында экинчи адамдын сөөгү табылган. Ал эми бүгүн, 1-январда үчүнчү эркек кишинин сөөгү табылып, тиешелүү тартипте милицияга өткөрүлүп берилди.

Учурда издөө-куткаруу иштери аяктаган, ал эми окуянын бардык жагдайларын аныктоо боюнча иликтөө иштери компетенттүү органдар тарабынан жүргүзүлүүдө. Окуянын себептери жана шарттары тергөөнүн жыйынтыгынан кийин белгилүү болот.