Жаңы жыл майрамында 3000ден ашуун айдоочунун жол эрежесин бузганы аныкталды

Жаңы жыл майрамын өткөрүү учурунда Жол кыймылынын коопсуздугун камсыздоо башкы башкармалыгы күчөтүлгөн тартипте кызмат өтөп, учурда дагы жогорку даярдык режиминде ишин улантууда. Бул тууралуу мекеменин маалымат кызматы кабарлады.

Маалыматка ылайык, майрамдык күндөрдө өлкө аймагында жалпы 3002ден ашуун айдоочу одоно жол эрежелерин бузганы үчүн жоопкерчиликке тартылды. Алардын ичинен:
- 75 айдоочу мас абалында унаа башкарган;
- 336 айдоочу ылдамдык чегин ашырганы үчүн кармалган.

Мындан сырткары, 602 автоунаа убактылуу айып короого киргизилди.

Майрам күндөрү республиканын аймагында 21 жол кырсыгы катталып, алардын көпчүлүгү жеңил чыгымдар менен коштолгону белгиленди. Жол коопсуздугун камсыздоочу кызматкерлер арасында мыйзам бузуу фактылары катталган жок.

Учурда өлкөдөгү жол коопсуздугу туруктуу абалда жана Жол кыймылынын коопсуздугун камсыздоо кызматынын жетекчилигинин жеке көзөмөлүндө турат.