Венесуэланын баш калаасында жардыруулар болду

Венесуэланын борбору Каракас шаарында жардыруулар болгонун чет элдик басылмалар жазышууда. Алдын ала маалыматтарга ылайык, жардыруу таң эрте болуп, бир нече аймактарда угулган.

Басылмаларда кабарлангандай, сокку Каракастагы аскерий жана авиабазага урулган. Анын кесепетинен Венесуэланын борборунун түштүк району электр энергиясыз калды. Буга удаа Венесуэланын үстүндөгү аба мейкиндиги толугу менен жабылды.

Социалдык тармактарда борбор калаанын көчөлөрүндө Венесуэланын аскердик техникалары, ошондой эле Каракаста тик учактар ​​тартылган видеолор да жарыяланган. Кадрлардан айрым аймактарда урулган сокку жана аскердик техниканын үндөрүн угууга болот.