Трамп Мадуронун кармалгандан кийинки биринчи сүрөтүн жарыялады

АКШнын президенти Дональд Трамп социалдык тармактагы баракчасына Венесуэланын президенти Николас Мадуронун сүрөтүн жарыялады.

Маалыматка ылайык, Мадурону америкалык аскерлер десанттык "Иводзима" кемесине алып келишкен.

Жарыяланган сүрөттө Николас Мадуро колдору кишенделген абалда турат. Анын жүзү жана көздөрү маска менен жарым-жартылай жабылган, ошондой эле угуу мүмкүнчүлүгүн чектеген атайын кулакчын тагылганы көрүнөт.

АКШ тараптын билдирүүсүнө караганда, Мадуро Каракас шаарында жүргүзүлгөн атайын операциянын жүрүшүндө кармалган. Операцияга "Дельта" атайын бөлүгү, тик учактар жана аскердик авиация тартылган.

Учурда Николас Мадурону Нью-Йорк шаарына жеткирүү пландалууда. Ал жерде ага АКШ тарабынан коюлган айыптар боюнча сот иши жүргүзүлмөкчү.