Венесуэлада убактылуу президент дайындалды

Венесуэланын Жогорку соту вице-президент Делси Родригести өлкөнүн президентинин милдетин аткаруучу кылып дайындады. Бул тууралуу чет элдик басылмалар жазышты.

Маалыматта айтылгандай, мындай чечим чет элдик аскердик агрессиядан улам жаралган өзгөчө кырдаалга байланыштуу кабыл алынган. Делси Родригестин убактылуу президент болуп дайындалышы мамлекеттик институттардын туруктуулугун камсыздап, тышкы күчтөрдүн дестабилизация аракеттерине каршы Венесуэланын эгемендигин бекемдейт деп белгиленет.

Эске салсак, Венесуэланын президенти Николас Мадуро 3-январга караган түнү АКШ армиясы тарабынан жүргүзүлгөн атайын операция учурунда кармалган. Операцияга "Дельта" атайын бөлүгү катышкан.

АКШ бийлиги Николас Мадурону "наркотерроризм" жана баңгизаттарды аткезчилик жол менен ташууга байланыштуу айыптоолор менен күнөөлөөдө.