Сатып жиберишкен... Чүй милициясы ууруларды кармады

Чүй облустук милициясы мал уурдоого шектелип 26 жаштагы 2 жаран жана 22 жаштагы 1 жаран кармалганын билдирди.

Маалымдалгандай, өткөн жылы 27-декабрда Сокулуктун Манас айылынын тургуну милицияга арыз менен кайрылып, мал короосунан 21 баш коюн уурдатканын айткан. Факт боюнча Кылмыш-жаза кодексинин "Мал уурдоо" беренеси менен кылмыш иши козголгон.

Натыйжада шектүү 3 киши колго түшүп, убактылуу кармоочу жайга киргизилген. Тергөөдө алар койлордун жарымын Кант шаарында сатып жиберишкенин, ал эми калган бөлүгүн Токмок шаарындагы мал базарында өткөрүшкөнүн айтып беришкен. Учурда тергөө иштери уланууда.