2025-жылы Кыргызстанда экспорттук мүмкүнчүлүктөр кеңейди

2025-жылы Кыргызстандын негизги экономикалык жетишкендиктеринин бири катары экспорттук мүмкүнчүлүктөрдүн кеңейиши эсептелди. Суу ресурстары, айыл чарба жана кайра иштетүү өнөр жайы министрлигинин маалыматы боюнча, өлкөдө өндүрүлгөн айыл чарба жана кайра иштетилген продукциялар дүйнөлүк рынокторго чыгып, экспорттун географиясы улам кеңейүүдө.

Кытай менен соода активдүү өнүгүүдө

Кыргызстан Кытайга активдүү продукция экспорттоодо. Азыр жүн, кашемир, төө буурчак, тоок эти жана тооктун субпродукттары боюнча 8 протокол, термикалык иштетилген эт жана тери боюнча 3 протокол макулдашылган. Ошондой эле кургатылган жер-жемиштердин экспорту башталып, алгачкы 23 тонна кургатылган өрүк Кытай рыногуна жөнөтүлгөн. Мындан тышкары, вино, өсүмдүк майы жана жашылчаларды экспорттоо боюнча даярдык иштери жүрүп жатат.

Европа жана Улуу Британия менен соода

Европа Биримдигине бал экспорттоого уруксат алуу процесси уланууда. Ал эми Улуу Британияга буга чейин 298 килограмм бал экспорттолуусу кыргыз балынын эл аралык рынокто өз ордун таба баштаганын көрсөттү.

Сауд Арабиясына мал экспорту

Сауд Арабиясына 144 жылкы экспорттолду, бул мал чарбачылык тармагындагы потенциалдын жогору экенин дагы бир жолу далилдеди.

Санариптик экспорт жана маркетплейстер

Ошондой эле, кургатылган жер-жемиштер, бал жана башка кайра иштетилген продукцияларды Wildberries маркетплейси аркылуу сатуу кеңейип, санариптик экспорт 2025-жылдын маанилүү багыттарынын бири болуп калды.

Экспорттук жетишкендиктер ички өндүрүштү колдоого, ишкерлер үчүн жаңы рынокторду ачууга жана өлкөнүн экономикалык өсүшүн камсыздоого өбөлгө түзүүдө.