Акжол Махмудов футзал боюнча Кыргызстандын улуттук курамасы менен жолукту

Балбан Акжол Махмудов футзал боюнча Кыргызстандын улуттук курама командасынын мүчөлөрү менен жолугушту. Бул тууралуу Футзал ассоциациясынан билдиришти.

Жолугушуунун жүрүшүндө Акжол Махмудов командага алдыда өтө турган Азия кубогунда ийгиликтерди каалап, спорттогу жеке тажрыйбасы, даярдык процесси жана мотивация тууралуу айтып берди. Ал жогорку жыйынтыктарга жетүүдө тартип, туруктуу эмгек жана ишенимдин маанилүүлүгүн белгиледи.

Эске салсак, футзал боюнча Азия кубогу 2026-жылдын 27-январынан 7-февралына чейин Индонезияда өтөт. Турнирге 16 команда катышат.

Кыргызстандын улуттук курамасы "А" тайпасында чыгып, Индонезия, Ирак жана Түштүк Кореянын курама командалары менен беттешет.

Белгилей кетсек, Акжол Махмудов Олимпиада оюндарынын эки жолку байге ээси. Ал Токио жана Париж Олимпиадаларында байгелүү орундарды ээлеген.