Пайдубалына суу толуп калган "Алтайдын” курулушу боюнча министрлик эмнелерди билдирди? (видео)

Социалдык тармактарда Бишкек шаарында курулуп жаткан “Алтай” турак жай шаарчасы боюнча видео тараган. Анда пайдубал үчүн казылган жерлерге суу толуп калганы көрсөтүлүп, коомчулукта тынчсыздануу жаралууда.

Курулуш, архитектура жана турак жай-коммуналдык чарба министрлиги аталган объект боюнча маалымат берди. Анда белгиленгендей, курулуш иштери башталганга чейин мыйзам талаптарына ылайык инженердик-геологиялык жана инженердик изилдөөлөр жүргүзүлгөн.

"Долбоордук документтерде дренаждык системди куруу, жер астындагы сууларды чыгаруу жана аймактын инженердик өзгөчөлүктөрүн эске алуу менен турак жай имараттарын беш кабаттан ашырбоо чечими кабыл алынган. Бул чаралар курулуш коопсуздугун камсыздоого багытталган. “Алтай” шаарчасы аз кабаттуу турак жай комплекси болуп саналат. Сейсмикалык коопсуздук маселелери Курулуш министрлигине караштуу тиешелүү мамлекеттик департаменттер тарабынан толук каралгандыгына байланыштуу, долбоорлоо жана куруу иштеринде министрликтин Улуттук илимдер академиясынын Сейсмология институту менен милдеттүү түрдө өзүнчө макулдашуусу талап кылынбайт",- деп кошумчаланды маалыматта.

Министрлик коомчулукту дүрбөлөң салбоого чакырат. Аны менен катар аталган аймакта Ош базарынын жаңы курулушу, жаңы автобекет, ошондой эле беш кабаттуу турак жай имараттары ийгиликтүү курулуп жатканын белгиледи.