Иранда массалык нааразычылык акцияларынын фонунда интернет толугу менен өчүрүлдү (видео)

Иранда улуттук валюта - риалдын кескин арзандашына байланыштуу чыккан нааразычылык акциялары 12-күн катары менен уланууда. Кечээ, 8-январда демонстранттар Тегерандын негизги магистралдарынын бири — Аятолла Кашани бульварын тосуп алышкан. Бул тууралуу чет элдик басылмалар билдиришүүдө.

Коопсуздук күчтөрү беткапчан демонстранттарга каршы көздөн жаш агызуучу газ колдонушкан. Активисттер тараткан видеолордо Тегеранда полициянын унаалары өрттөнүп жатканы да көрүнөт. Ошондой эле Мешхед, Керманшах жана башка ири шаарларда массалык нааразычылык акциялары болуп жатканы кабарланууда.

Ирандагы массалык нааразычылык акцияларынын фонунда бийлик интернетти дээрлик толугу менен өчүрдү. NetBlocks уюмунун маалыматына ылайык, өлкө жалпы улуттук интернет-блэкаут абалына кептелди, ал эми 8-январда интернет-трафик 90 пайызга азайганын билдирди.

Акыркы маалыматтар боюнча, акция учурунда кеминде 45 адам каза тапты.