The New York Times саякат тизмесине Борбордук Азиядан жалгыз Кыргызстанды киргизди

The New York Times басылмасы 2026-жылы саякаттоо үчүн сунуш кылынган багыттардын катарына Кыргызстандын Тянь-Шань тоолорун киргизди. Макалада өлкөнүн чыгышынан батышты карай кеткен 1243 чакырымдык жол сунушталып, аны Борбордук Азиядагы эң таасирдүү жөө жүрүү маршруттарынын бири деп бааланды.

Маршруттун негизги кооз жайлары катары Көл-Суу көлү, XIV–XV кылымдарда курулган Таш-Рабат кербен сарайы жана Саймалуу-Таш аймагы белгиленген. Анда саякат үчүн июндан сентябрга чейинки мезгилди сунушташкан. Анткени ашуулар ачылып, тоодогу көлдөр тоңо элек болот.

Журналисттердин баамында, бул маршрут жаратылыштын кооздугун, тарыхый эстеликтерди жана көчмөндөрдүн маданий мурасын бириктирген, 2026-жылы сөзсүз көрүлө турган багыттардын бири. Борбордук Азиядан аталган тизмеге Кыргызстандын Тянь-Шаны гана киргизилди.