Трамп Венесуэлада шайлоо өткөрүү үчүн убакыт керек экенин айтты

АКШнын президенти Дональд Трамп Венесуэлада шайлоо өткөрүү үчүн убакыт керек экенин айтты. Бул тууралуу ал Fox News каналына берген маегинде билдиргенин чет элдик басылмалар жазышууда.

Ак үйдүн башчысы ошондой эле Венесуэланы кайра калыбына келтирүү маселеси да бар экенин белгилеп, АКШнын Венесуэладагы операциясы аймакка туруктуулук алып келгенине ишенерин билдирген.

Мындан тышкары, Трамп келерки аптада АКШга келе турган Венесуэланын оппозиция лидери Мария Корина Мачадо менен жолугушарын жарыялап, аны "жакшы адам" деп атаган.

Буга чейин Трамп Мачадону колдобой койгонун The Washington Post басылмасы жазып чыккан.

Эске салсак, 3-январда АКШ Венесуэлада атайын операция жүргүзүп, өлкөнүн лидери Николас Мадурону жубайы менен бирге туткундап, алып чыгып кеткен. 5-январда Венесуэланы убактылуу президент катары Делси Родригес башкарууга алды. Ал буга чейин өлкөнүн вице-президенти болуп иштеп турган.

Вашингтон Родригес менен тынымсыз байланышта экенин билдирип келет.