Трамп Гренландияга басып кирүү планын даярдап жатканы айтылууда

АКШнын президенти Дональд Трамп атайын операциялар күчтөрүнүн командирлерине Гренландияга мүмкүн болгон басып кирүү планын иштеп чыгууну тапшырды. Бирок АКШнын жогорку даражалуу аскер жетекчилери бул демилгеге каршы чыгып жатышат. Бул тууралуу Daily Mail басылмасы жазып чыкты.

Маалыматта айтылгандай, абалды билгендер Трамптын администрациясындагы катаал багытты жактаган топ бул демилгени активдүү илгерилетип жатканын белгилешкен. Аталган топту президенттин саясий кеңешчиси Стивен Миллер жетектеп, алар Венесуэланын лидери Николас Мадурону кармоо боюнча операциянын ийгилигинен улам тез аракет кылууну көздөшүүдө. Алардын пикиринде, АКШ Гренландияны Орусия же Кытай андан мурда көзөмөлгө албашы үчүн шашылыш кадамга барышы керек.

Ошол эле учурда британ дипломатык булактар Дональд Трампты бул демилгеге ички саясий себептер да түртүп жатканын белгилешет. Тактап айтканда, АКШдагы экономикалык кырдаалдан шайлоочулардын көңүлүн алаксытуу максаты бар экени айтылууда. Быйыл өтө турган Конгресске аралык шайлоодон кийин Трамп мыйзам чыгаруу бийлигин жоготуп алышы мүмкүн.

Бирок Гренландия маселесиндеги мындай кадам Улуу Британиянын премьер-министри Кир Стармер менен олуттуу карама-каршылыкка алып келип, НАТО альянсынын ичинде терең ажырым жаратышы ыктымал экени эскертилет.

Булактардын маалыматына караганда, президент АКШнын Атайын операциялар боюнча биргелешкен командачылыгына басып кирүү планын даярдоону тапшырган. Бирок Куралдуу күчтөрдүн штаб жетекчилери операциянын мыйзамсыз экенин жана Конгресстин колдоосу жоктугун негиз кылып, бул тапшырмага каршылык көрсөтүп жатканы кабарланат.