Тегерандын борборундагы нааразылык акциялары учурунда 217 адам каза тапканы айтылууда

Ирандын борбору Тегерандагы нааразылык акцияларына ок атылган учурда 217 адам каза болгону айтылууда. Бул тууралуу Time журналы ирандык клиникалардын биринин дарыгерине шилтеме берүү менен кабарлады. Чет элдик басылмалар билдиргендей, курман болгондордун көпчүлүгү октон алган жаракаттардан улам көз жумган.

Ошол эле учурда ирандык расмий жана укук коргоо булактары башкача статистиканы келтирүүдө. HRANA уюмунун маалыматына караганда, акыркы эки жумада Иранда кеминде 65 адам каза болгон. Ал эми Tasnim агенттиги башаламандыктар маалында 15 укук коргоо кызматкери өлтүрүлгөнүн билдирүүдө.

АКШнын президенти Дональд Трамп Иран бийлигине эскертүү жасап, демонстранттарга каршы зомбулук улана берсе, катуу чара көрүлөрүн айткан.

Ирандагы нааразылык акциялары декабрдын аягында улуттук валютанын арзандашы жана баалардын өсүшү менен башталган. Өкмөт бул нааразылыктардын артында АКШ менен Израил турат деп эсептейт.