Бишкекте мас жаран май куюучу жайда айдоочуга кол салып, унаасын уурдап кетти (видео) 

Бишкекте май куюучу жайда айдоочуга кол салып, анын унаасын айдап кеткен шектүү кармалды. Бул тууралуу бүгүн, 11-январда милициянын Кайгуул кызматынан билдирди.

Маалым болгондой, окуя 10-январда саат 10:00 чамасында Руставели жана Гагарин көчөлөрүнүн кесилишинде жайгашкан май куюучу жайда болгон. Алдын ала маалыматтарга ылайык, мас абалындагы жаран айдоочудан акча сураган. Ал баш тарткандан кийин мас жаран агрессивдүү мамиле жасап, ага кол салган. Чыр учурунда шектүү жаран жабырлануучуну түртүп жиберип, анын ДЭУ Матиз үлгүсүндөгү автоунаасын мыйзамсыз айдап кетип, Гагарин көчөсү аркылуу из жашырган.

Натыйжада шаардык милициянын аракети менен ал Гагарин жана Алыкулов көчөлөрүнүн кесилишинде кармалды. Кармалган жаран 2001-жылы туулган У.уулу Н. экендиги аныкталды.

Тергөө иштери жүрүүдө.