2026-жылдын башынан берки экинчи магниттик бороон Жерди каптады

2026-жылдын башынан берки экинчи магниттик бороон 11-январга караган түнү Жерди каптады. Бул тууралуу Орусиянын Илимдер академиясынын Космостук изилдөөлөр институтунун Күн астрономиясы лабораториясы билдиргенин чет элдик басылмалар жазышууда.

Байкоо жүргүзүү үчүн ылайыктуу шарттар Кемерово жана Челябинск облустарында, Ханты-Мансий автономдук округунда, Мурманск облусунун айрым жерлеринде, ошондой эле Европанын чоң бөлүгүндө — Скандинавия өлкөлөрүндө жана андан да түштүктө жайгашкан Польша менен Германияда болгонун лабораториянын өкүлдөрү айтышты.

Окумуштуулардын божомолу боюнча, бул бороон акыркы бир нече күн ичинде Күндө болгон алсыз жарылуулардын биринен бөлүнүп чыккан плазма булутунун Жерге жетишинин натыйжасы.

2026-жылдагы биринчи магниттик бороон 3-январга караган түнү башталган. Ал 31-декабрдагы Күндөгү жарылуунун натыйжасында болгон. Ал эми 8-январь күнү Күндө дагы бир ири жарылуу катталды.