Meta Австралияга өспүрүмдөрдүн социалдык тармактарга кирүүсүнө салган тыюусун кайра кароону сунуштады 

Америкалык ишкер Марк Цукербергге таандык Meta компаниясы дүйнөдө биринчи болуп 16 жашка чейинкилердин социалдык тармактарга кирүүсүнө тыюу салган Австралия бул чектөөсүн кайра карап чыгышы керектигин билдирди. Бул тууралуу чет элдик басылмалар жазышты.

Маалыматка ылайык, компания аталган өлкөдөгү жаңы мыйзамга байланыштуу социалдык тармакта 544 миңден ашык баракчаны жапкан. Өспүрүмдөрдүн социалдык тармактарды колдонуусуна тыюу салган дүйнөдөгү биринчи мыйзам Австралияда кабыл алынып, өткөн жылдын 10-декабрында күчүнө кирген.

Мындан улам Meta жашы жете электердин Инстаграмдан 331 миң, Фейсбуктан 173 миң жана Тридс социалдык тармагынан 40 миң баракчасын өчүргөн. Учурда баракчаларды текшерүү иштери дагы да уланууда. Ошондой эле Meta Австралия мындай чектөөсүн кайра карап чыгышы керектигин белгилеп, толук тыюу эмес чектөөлөрдү гана киргизүүнү сунуштады.